నాపై మహిళా డ్యాన్సర్లు దాడి చేశారు: పోలీసులకు ఫిర్యాదు చేసిన జానీమాస్టర్ భార్య

టాలీవుడ్ ప్రముఖ కొరియోగ్రాఫర్ జానీ మాస్టర్ భార్య సుమలత పోలీసులను ఆశ్రయించారు. తనపై కొందరు మహిళా డ్యాన్సర్లు దాడి చేశారని ఆరోపిస్తూ ఆమె బుధవారం బంజారాహిల్స్ పోలీస్ స్టేషన్‌లో ఫిర్యాదు చేశారు. మరోవైపు, ఆమెను తెలుగు సినిమా డ్యాన్సర్స్ అసోసియేషన్ అధ్యక్ష పదవి నుంచి తొలగిస్తూ ఫిల్మ్ ఫెడరేషన్ కీలక నిర్ణయం తీసుకుంది.

కొరియోగ్రాఫర్ రఘు మాస్టర్‌కు చెందిన మహిళా డ్యాన్సర్లు తనపై దాడికి పాల్పడ్డారని సుమలత తన ఫిర్యాదులో పేర్కొన్నారు. 'మినిట్స్ బుక్' విషయంలో తలెత్తిన వివాదమే ఈ దాడికి కారణమని తెలుస్తోంది. అయితే, సుమలతే బలవంతంగా మినిట్స్ బుక్‌ను తీసుకెళ్లేందుకు ప్రయత్నించగా, తాము అడ్డుకున్నామని అవతలి వర్గం ఆరోపిస్తోంది. ఈ ఘటనపై పోలీసులు విచారణ జరుపుతున్నారు.

ఫిల్మ్ ఫెడరేషన్‌ నిర్వహించిన సమావేశంలో సుమలతకు భారీ ఎదురుదెబ్బ తగిలింది. డ్యాన్సర్స్‌లలో ఆమెకు మెజారిటీ మద్దతు లేకపోవడంతో, ఆమె నేతృత్వంలోని కార్యవర్గాన్ని ఫెడరేషన్ పూర్తిగా రద్దు చేసింది. దీనితో ఆమె డ్యాన్సర్స్ అసోసియేషన్ అధ్యక్ష పదవిని కోల్పోయారు. మొత్తం 225 మంది డ్యాన్సర్లు హాజరైన ఈ సమావేశంలో సుమలతకు కేవలం 11 మంది మాత్రమే మద్దతు తెలపగా, రఘు మాస్టర్‌ వర్గానికి 214 మంది బాసటగా నిలిచారు. ఈ పరిణామాల నేపథ్యంలో, అక్టోబర్ 11న డ్యాన్సర్స్ అసోసియేషన్‌కు నూతనంగా ఎన్నికలు నిర్వహించనున్నట్లు ప్రకటించారు.